2012.03.18 失敗吸血蟲，剩係咬個窿；地圖鬆郁矇，噏左噏右到處碰。     蔣健輝

真係好多雨，上周差唔多日日都落雨。星期六，重係落緊雨，好担心星期日天氣係點。如果重係咁落法，去唔去遠足呢？睇下E貓，除非真係落好大狗屎，否則風雨不改。都好，今次係尼國行山前最後練習，如果落雨，試吓我啲rain gears都好噃！

星期日，6點起身，打開窗簾，好天到不得了。食過出前一丁，帶齊裝備，7點正驅車去藍山。集齊行友，一行12人，準時9點半出發，先由路面一直向河谷下行。因為雨水充足，山路都係泥辦，又濕又跣，行唔得快。好彩天公造美，好天但唔太曬，温度又適中，行得都幾舒服。

冇耐，就到河谷底，因為水頭充足，條河比預期深咗。赤腳澗水過河係預咗嘅，首先要决定由邊度過河。水都幾急，本來明顯有石堆嘅地方，理應係上佳過河地點，但都因為水深及腰而放棄。向下游走，有個淺灘，水深及膝，就呢度過。不過水都係急，河底石又跣，都有少少危險。冇人估得到，士提夫居然孭咗綑攀山繩，啱晒，將繩綁住兩岸造成扶手，咁，過河就放心啦。各人抹乾腳板，穿好鞋襪，再上征途。

過河後，大隊就沿河一路向上游行。可能係雨水夠，路邊植物蔓生到行山徑，一路上，經常俾樹籐勾腳，一個唔留神，好容易PK。路邊又經常有葉尖或樹枝帶刺嘅植物，成日就兜口兜面打埋嚟。又要顧上，又要顧下，非常忙碌。唔知係唔係最近遇過風暴，經常有倒下嘅大樹攔路，我哋一係爬過去，一係捐過去，似足障礙賽，一啲都唔單調。

行行吓，好似唔係路，條路好似係對岸，於是又要作第二次渡河。河中石堆有倒下嘅樹幹作為橋，唔駛除鞋都得，我坐喺河中大石做人肉扶手，行友亦互相扶持，齊登彼岸。

進度比預期慢，各人快手快腳繼續行程。冇耐，前面行友，有正路唔行，神色凝重，縮埋一邊慢慢行。原來有條米幾長嘅---蛇，佢碧綠色，身上有白色花點，唔知有冇毒。我哋行過時，佢亦慢慢向後褪，睇嚟，我哋怕佢時，佢亦怕我哋。大家保持距離，互相尊重，咁就世界和平。小青，拜拜喇。咁大個人，第一次咁樣見到蛇。

咦！又冇咗路，於是又作第三次渡河，河面唔太闊，亦有好多石俾你踩。你扶我，我扶你，又過一關。

又到食晏時候，喺河畔大餐廳，各人自己揾嚿大石，坐低食晏。Peter一邊咬住清記三文治，一邊展示佢彪炳戰績留底嘅血紅印記，各人仔細欣賞之際，發現佢襪上有樹枝狀物體，重駛問？係山蛭leech，又名琪乸。Peter一手捉佢出嚟，重重掟佢落地，呢條失敗嘅蛭，吸唔到血，唯有頭岳岳，再去揾第二個老襯。

我食完义燒餐包，再食甜品，正在無聊，睇到襪頭，點解多咗個label？睇真，乜有條山蛭喺我隻腳度開緊餐。原來leech喺未食血前，只得約1mm直徑。此刻呢隻蛭仔，已有5mm粗，重力関係，下半截係一個波，上半截係一條虫。重未吸飽就俾我發現，你唔好彩喇。一手掹佢出嚟，掟落地下。佢典兩典，拉番長個身體，又頭岳岳，走人喇。回頭睇吓隻腳，有個細窿，標緊一滴血，冇繼續流。本來leech咬人前，會俾啲抗凝血劑你嘆，搞到你流血不止。可能行咗幾粒鐘，我啲血杰過芝蔴糊，只係流咗一滴血咁大把，一張bandaid就搞掂。

問，點解唔做瓜佢？大家出嚟揾食啫，佢都係盡咗佢做leech嘅本份，我又冇乜損失，算啦！………大家冇答嗲。睇嚟，我呢番偉論，唔係幾受認同。

各人見到咁嘅光景，即刻翻箱倒籠，睇吓自己有冇收理一兩條leeh，結果，史提夫有一條，又係一條失敗嘅leech，其餘人等均保持清白之身。

因為成日過河，用去不少時間，擒擒青食過晏仔，即刻趕路。行唔夠十分鐘，條路又冇咗！從現場環境睇嚟，可能最近冧過山泥，將路掩理。死嘞！如果揾唔到路，咪要喺度過夜？嚇到個個標晒汗。好嘞！而家要決定：一係，揾路繼續前行；一係，走回頭路。正在躊躇之間，居然發現繼續前行之路，邊度？河對岸！吓！又過河。行友對過河已失去新鮮感，lelee  lahlah，鞋都唔除，踩住石頭就過河。

行行重行行，上高落低，走過叢林，前面出現一座宏偉瀑布。著名嘅維多利亞瀑布就喺眼前，各人目瞪口呆，除咗讚嘆造物偉大外，更加係知道一個事實：行---錯---路。見到瀑布，清楚知道位置就安心喇。錯有錯著，如果按預定行程，我哋會行多兩粒鐘，唔係個個頂得蒲也，而家就啱啱好。

由瀑布一直向上行，全程上斜，行到乜都曉。一粒鐘左右返回地面，終於行完，yeah….！但因為行錯路，返唔到去架車度，要call的士去攞番架車。唔到你唔信，一上的士，就落起雨嚟，我哋真係得到眷顧，要感恩喇。

The Happy Wanderer

I love to go a-wandering,
Along the mountain track,
And as I go, I love to sing,
My knapsack on my back.

Chorus:
Val-deri,Val-dera,
Val-deri,
Val-dera-ha-ha-ha-ha-ha
Val-deri,Val-dera.
My knapsack on my back.

I love to wander by the stream
That dances in the sun,
So joyously it calls to me,
"Come! Join my happy song!"

I wave my hat to all I meet,
And they wave back to me,
And blackbirds call so loud and sweet
From every green wood tree.

High overhead, the skylarks wing,
They never rest at home
But just like me, they love to sing,
As o'er the world we roam.

Oh, may I go a-wandering
Until the day I die!
Oh, may I always laugh and sing,
Beneath God's clear blue sky!

我行山時成日就諗起呢首歌

蔣健輝

Ps. 相放在面書

http://www.facebook.com/media/set/?set=a.273670322710395.63787.100002022875470&type=1&l=c1a730b230