柯拿，大家好，
真係好少見尐咁嘅天氣，呢幾個禮拜都係咁，落大雨，一陣又出大太陽，然後又陰埋個天，翻晒大風⋯⋯，如是者，
十幾分鐘內，天氣不斷變化。㬨到唔敢晾衫出室外，見到太陽都唔敢出去踩單車。變咗落湯雞事小，條路又跣，始終係危險，我咁惜身，點會冒的咁嘅險！
早幾日，夜晚同阿仔、新抱仔食完飯返屋企，抬起頭，成天星星伴住向上彎嘅一輪明月。哦，上弦月，農曆八月嘅上弦月，
即係話中秋就喺街角喇，講吓中秋都好喎。
講過好多次，想知道臨近乜嘢節日，只要出街市行個匝就知喇。
中秋，梗係大節，早成個月前，紙紥鋪騎樓底就掛滿燈籠，有平有貴，豐儉由人。最平嘅梗係風琴式摺疊燈籠，有大有細，記憶中，斗零、一毫都有交易。燈籠製作簡單，用幼鐵線穿住。
拉開燈籠，五顏六色，最初只有圓形燈籠，後來，方形、
三角形丶及其他古怪形狀都造得出。記得移民前，
特登買咗十個八個摺疊燈籠運埋嚟。第一年喺澳洲過嘅中秋，
就喺前園點燈籠食月餅，以解鄉愁。一晃，已經係二十二年前嘅事。
話咗豐儉由人，有個閒錢嘅梗係買尐貴尐嘅喇。用竹篾、白紙條紥成骨架，再黐上彩色玻璃紙、皺紙嘅紥作，就梗係風間、
或者係阿福買嚟演嘢嘅貴價燈籠。嗰時紙紥鋪，
好多都有師傅製作自己嘅燈籠嚟賣。中秋前一段日子行過呢啲鋪頭，
都會見到師傅喺鋪頭裏面，好忙碌咁削竹篾、裁紙、黏燈籠。一個個兔仔燈籠、楊桃燈籠、金魚燈籠⋯⋯黐好之後，就吊喺鋪頭天花，等人買咯。紥作燈籠，除咗兔仔楊桃外，飛機大炮坦克車都係題材，再唔講後來叮噹、鹹蛋超人⋯⋯，商業社會，乜嘢賣得錢，就有人去整。其實喺紙紥鋪可以買竹篾、紙條等材料自己整燈籠，我小學都試過，想話整個楊桃燈籠。結果？梗係鬼五馬六，失敗收場。
嗰時，多數人都窮，邊有多餘錢，好多細路都會自製燈籠。材料可以係細紙皮箱、鞋盒、月餅盒，用沙田柚，果皮ࠝ?開四瓣，
又係一個燈籠喇。社會富裕咗，燈籠都係工廠製造，塑膠嘅、設計精美，靚到飛起，但係細路仔就冇咗嗰種質樸嘅創造樂趣，我都係鍾意我嘅童年。
中秋節，點少得月餅。由細到大我認識中嘅廣東月餅都係甜嘅，
直到有一次，港台有個講月餅嘅特輯，訪問一個資深月餅人。佢話，
最初，月餅係䶢嘅！尐饀係肉類嚟嘅，普通嘅就係豬肉饀，
可以係燒肉，可以係义燒；袊貴尐可以用雞肉。食不厭精，
整吓整吓，連鮑魚等名貴海味都變成月餅饀料。余生也晚，
冇福氣趕及食一個「鮑魚雞球月」。不過據說而家興懷舊，又有人整鹹月餅嚟賣，我未食過，不過睇嚟都唔慌好食。
甜月餅梗係用蓮蓉。我阿爸話：傻仔，邊得嚟咁多蓮子蓉，其實溝咗好多薯仔蓉就真！吖，係真唔係呢？不過我就話，
理得佢係乜蓉，總之好食就通喇。
嗰時，邊度賣月餅呢？識焗餅嘅地方就有月餅賣，我嘅記憶，只有兩類地方：酒樓，餅家。
鵝頸街市，堅拿道西左轉行出電車路，
灣仔大公廁斜對面就係鼎鼎大名嘅英男大茶樓，樓下鋪位係入口兼大堂，闊樓梯行上樓上，二樓全層就係餐堂，
好大，由堅拿道西一直去到寶靈頓道咁大。呢間英男應該係我人生第一間去嘅茶樓。樓下大堂有玻璃飾櫃，平時就擺尐中式餅食，有甜有鹹，當然仲有嫁女餅，飾櫃枱面梗有幾個圓形大玻璃甕，擺咗尐平尐嘅小餅食，好似：棋子餅、雞仔餅、合桃酥、笑口棗等等。一到過時過節，就放滿應節食品。到咗中秋，唔使問，梗係擺滿晒月餅喇。
再向灣仔方向行，史釗域道嘅榮華酒樓，佢嘅月餅更加係馳名中外喇啩。我好榮幸同佢都有尐淵源，ࡃ?
仔嗰陣喺呢度做過點心仔，記憶中，人工係七、八蚊一日。
每到中秋，佢唔止賣餅，仲喺鋪前搭起大花牌，最初花牌上都係嫦娥奔月，吳剛、玉兔，丹桂樹等傳統人物故事。年年係咁，睇得多都厭喇，唔知幾時開始，改用社會民生時事做花牌故事主題。幾間著名月餅大茶樓都係咁做，成為咗舉世無雙嘅香港中秋一大特色。
以前，街頭巷尾都有中式餅家，鋪頭有工場，早午晚定時出爐，街坊熟晒地埗，到時到候就會嚟買熱辣辣新鮮出爐麪麭。難忘記，熱辣辣、香噴噴，一毫子一個雞尾麭，認真和味。嗰時未有超級市場，要買方麭，就要喺餅家買，可以買一磅，用白色紙袋裝住，有八塊；又可以買半磅，四塊。吖，點解方麭又叫磅麭？一磅麭又係唔係足一磅呢？臨近中秋節，
行過呢尐餅家，一陣陣焗月餅味就由鋪頭散發出嚟，喺條街，遠遠都聞得到，個個就知⋯⋯，哦，中秋近矣。餅店玻璃飾櫃，
分門別類，擺滿一個一個月餅，客人揀好再放入盒內。逐個買又得，成盒買又得，非常靈活。月餅盒多數係紙盒，想要鐡盒？得！畀多個錢就可以升呢喇。嗰陣，呢尐鐵盒裝完月餅，洗乾浄，用嚟裝相又得，裝錢又得，裝乜都得，真係可以用一世。摷吓屋企，睇吓有冇一兩個咁嘅鐵盒，裝住寶珠、芳芳尐明星相。
餅店櫃面對上半空有鐵架，吊住一隻二隻豬仔餅。咁，豬仔餅又係乜傢伙呢？原來喺整月餅過程中，會剩低尐餅皮碎，舊時，食得又點會嘥嘢，將佢搓成個豬樣，焗月餅時，順手一齊焗埋佢，就變成豬仔餅。唔好睇佢只係頭頭尾尾，
焗咗出嚟，又有得玩，又有得食，ࡃ?仔ࡃ?妹最鍾意。
呢尐餅皮碎可以搓成個豬様外，又可以搓成金魚、蝴蝶、
公雞等公仔餠。不過我最鍾意都係豬仔，因為每隻都有個五顏六色嘅塑膠豬籠裝住，十分趣怪。
五、六十年代，到處都係窮人，兩餐一宿都好艱難，邊有閒錢買月餅？如果只係自己一家人，食多食少，又有乜所謂，但如果家族一大棚人，又或者工作、生活關係要送禮，過時過節，要籌措呢幾盒月餅，絕對唔係易事。香港人腦筋咁靈活，
有乜嘢難倒我哋！分期付款，零存整付，「月餅會」就應運而生喇。蔣家人丁單薄，又唔使送乜嘢禮，餐搵餐食餐餐清，
從來未做過月餅會。據說，一份月餅會，有十盒月餅。唔要咁多，又可以做半份，都有五盒，豐儉由人。做月餅會，又分級數，
畀得起多尐錢，當然就攞靚尐嘅餅。幾多盒三黃、幾多盒單黃、幾多盒齋蓮蓉，唔同組合，價錢當然唔同。記得「沙里洪巴」呢首歌：有錢嘅老爺坑上坐，冇錢嘅？咪坐地下咯。古今中外，
從來如此。
啱啱講過，蔣家唔做月餅會，食幾多買幾多，非常簡單。
記得登龍街轉出電車路，消防局斜對面，有間古老中式餅家，
叫做泰山餅家，臨近中秋，月餅飄香，離九條街都聞到焗餅嘅香味，細時就喺嗰度買月餅，後來有珠江橋牌月餅，我哋嗰時愛祖國，梗係用國貨，不過唔使去國貨公司買，我哋會去電車職工會小賣部，工人階級買嘢，梗計平尐，大家係階級兄弟吖嘛。
中秋係大節，香港人過節，梗要由拜神開始。八月十五呢一日，一家之煮晨早出動，去街市買餸做節。第一樣要做嘅，
係即刻去雞鴨檔揀返隻肥雞，趁雞佬劏雞之際，再去買埋其他餸菜。行過生果檔，記住買中秋節應節生果，除咗沙梨、提子外，最點睛嘅就係楊桃、菱角、轆柚同埋龍眼。買好餸，千祈要返去雞檔攞返隻劏好嘅雞，拜神唔見雞？真大劑！
蔣家一向簡單，唔理乜節，嚟嚟去去都係冬菇發財好市，然後斬大嚿燒肉，炒埋一碟；再白斬鮮雞，
雞雜就切粒炒腰果西芹粒，咁就係做節佳餚。
今晚咁好餸，阿爸梗要嗒返杯九江孖蒸，所以，呢餐晚飯食得特別耐。飯後，將碗諜掃埋一邊，一齊食飯後果，咁多生果擺晒出嚟，食唔晒又唔會嘥，生果有皮，可以擺得好耐。嗰時切楊桃唔會橫切成粒星嘅樣，係直切避開尐核，其實，
咁至方便食。不過，我唔多食楊桃，有陣怪味我唔鍾意。開轆柚一定要小心，四瓣轆柚皮，用兩支蠟燭腳或者竹篾撐住，
再用鐵綫、棉繩吊住，挿一支洋燭，就係今晚出去威威嘅燈籠。仲有，黑 mun mun
嘅菱角其實唔知點食，個殼又硬，用牙咬，尖角又會拮親口，用鎚
dup，咪 dup 爛張枱，辛辛苦苦開到，裏面得 did did 咁 dur
白色粉狀嘅肉，撬些少出嚟擺入口，唓，淡 mou mou，都唔知有乜好食，點解佢會成為中秋節必備生果，真係唔明。不過，記得有一次，阿媽用兩個菱角，上下前後挖咗四個窿，當然保持菱角個樣，將果肉撩晒出嚟，兩個菱角一個疊一個，用一支蠟燭腳挿住穿起，再用幼繩，
不知如何，穿嚟搭去。阿媽一手揸住蠟燭腳，一手址郁條繩。哈，兩個菱角就喺度氹氹轉，真過癮。記憶中，佢只係表演過一次，我又衰，咁多年嚟，居然冇問佢點整。一代工藝，從此煙滅，都係我嘅錯。
講起菱角，記起歡樂今宵，聽過肥肥同羅記，
情侶合唱團唱過呢首歌：
採紅菱
作詞：狄薏
作曲：梅翁
我們倆划著船兒
採紅菱呀採紅菱
得呀得郎有情
得呀得妹有心
就好像兩角菱
也是同日生呀
我倆一條心
我們倆划著船兒
採紅菱呀採紅菱
得呀得妹有心
得呀得郎有情
就好像兩角菱
從來不分離呀
我倆心相印
划著船兒到湖心呀
你看呀麼看分明
湖水清呀照雙影
就好像兩角菱
划著船到湖心呀
你看呀麼看分明
一個你呀一個我
就好像兩角菱
（重覆第一段，收工）
咦，菱角黑 mun mun 㗎，點解叫做紅菱？
呢餐晚飯，連場好戲，而家到月餅出嚟，打開餅盒，阿爸攞出開檔用嚟批菜嘅摺刀，兩刀開四份，一家四口，一人一
kei，唔使爭，啱啱好。我剩係食蓮蓉月餅，最憎食五仁、火腿、豆沙月。呢餐飯咁多嘢搞，睇返轉頭，都係畀的藉口一家人坐埋一齊。又係嘅，人月兩團圓，善哉善哉。
嗰時政府都考慮周到，中秋節正日冇假放，不過第二日放假，叫中秋節翌日假期。各位ࡃ?仔ࡃ?妹，今晚可以玩夜尐喇。今次帶備自製燈籠、火柴、洋燭，照例走去隔籬，叫埋豬肉榮個仔，
同埋賣魚勝個女出街威咯。
中秋晚，屋企特別放人，可以出夜街。附近住嘅ࡃ?仔ࡃ?妹，
全部走晒落嚟。嘩，鵝頸街市，堅拿道東、西大水坑兩岸石壆，
真係通街都係人。鵝頸橋呢條大水坑，
嗰時真係有條鐵欄桿嘅石屎橋，由羅素街跨過大水坑到達堅拿道西嘅灣仔道。中秋夜，攞住燈籠，
企喺橋上，望住水中倒影（雖然係黑色嘅坑渠水），吹住輕風（
雖然帶有強勁坑渠臭味），都係幾有詩意嘅。周圍企得人嘅地方，
都聚集三三兩兩，一堆二堆人，首先圍埋劃火柴點洋燭（遮擋風吹）
，搞掂架步嘞，就一齊攞住燈籠四圍騰。剩係一班友自己騰唔夠，
梗係要四圍眼超超，品評一吓人哋嘅燈籠。遇到得意、特別嘅燈籠，
就圍埋去睇。呵，自己嘅燈籠咁受推崇，呢個籠主梗係覺得威威喇。
有時洋燭畀風吹熄，我唔使急於自己劃火柴，行過隔籬，講聲：「
借火」，雖然三唔識七，都會摺起燈籠，用佢支洋燭幫我點返著，
呢尐係約定俗成，毋須基本法規定。Hmm⋯⋯而家諗返起，我唔知有冇咁做：假設行行吓，見到隔籬街阿妹珠，
佢攞住燈籠迎面行埋嚟，我會唔會吹熄自己個燈籠⋯⋯⋯⋯呢又？
呵，童年時就如此經過⋯⋯⋯⋯。
喺袋鼠國都有不少社區舉辦類似節目，雪梨地區，
最大型嘅中秋活動，相信係一年一度，卡市 Cabramatta
嘅中秋節嘉年華 Moon Festival。呢個活動亦係亞洲地區以外，
世界上最大嘅中秋節慶祝活動。
卡市聚居咗好多越南人及華裔越南人，係全澳最大嘅越南埠。
中秋前嘅星期日，越南埠街市附近封晒路，馬路擺滿㰙檔，
有賣手工藝品、有賣各式民族食品，街中間搭咗表演舞台，
邀請不同民族團體表演有民族特色嘅節目。九月，呢度仲係幾凍，
最記得有一年，又凍又大風，有團體表演肚皮舞，舞者着好少衫，
唔知佢哋凍唔凍，不過，台下就睇到熱辣辣嘞。卡市呢個大節目，
阿仔世翀做咗好多年司儀，佢要同另一個講越南話嘅司儀合作，一個英越語，一個英粵語。今日九月七日，我寫緊呢篇嘢之時，
阿仔、Ivy 就喺卡市做緊 2014 中秋節司儀。
我住呢個小區周圍亦有唔少華人居住，多數係香港、星馬華人。
大家都講廣東話，同聲同氣，二十幾年前組織咗一個華人協會，
每年，到時到候亦搞類似節目，但因八、九月仍然係雨季，
焗住要過後至搞得，所以唔叫中秋節，叫提燈晚會 Lantern Night
。活動除咗民族小食㰙位、舞獅、民族團體文藝表演外，
戲肉係全公園熄燈，全體參加者揸住燈籠，喺獅鼓聲中，
跟住醒獅喺公園行個大運，跟住大放煙花。呢個活動搞咗廿幾年，
非常成功，本州政府及聯邦政府都有政要出席。
成為本區每年一度嘅重點節目。喺提燈晚會早一個月左右，區報
local paper 已經大力宣傳。1998 年，我家大小姐當時未夠八歲，一幅手提燈籠嘅相登咗喺區報嘅第一版。吓，又係
15 年前嘅事喇。
今晚，阿仔、Ivy
做完司儀，大小姐同我倆一齊去食馬拉餐，馬來餐廳人山人海，
點解？今日呢度係父親節，咁，我又係主角喇。
五個人一路食馬拉薄餅海南雞，一路雞啄唔斷爭講嘢，好鬼熱鬧，
食完唔夠喉，仲要返屋企切月餅再噏過。
打開門，行出後園，抬頭向東，朦朧月光就喺眼前，不過又唔夠圓，
又唔明亮，雲霧時聚時散，陰晴不定，真係似足呢排，
北望東方之珠嘅心情。咦，今日不過係迎月，聽日喇，
聽日至係正日，唔係話：明天會更好咩？又有人話：
希望在明天吖嘛。好，又等一等，睇吓明天會點。不過，面對今日咁嘅氣候，會有好天咩？我好悲觀。
每到中秋，人人都諗蘇文忠公水調歌頭尾兩句：「但願人長久，
千里共嬋娟」。我偏要學佢嘅死對頭抝相公，專鬥氣，今年，
我唔揀尾，就揀頭兩句。我要問，仲要好大聲咁問：
「明月幾時有？把酒問青天。」
再噏過，
嚤囉
ps. 要睇相，可上面書
https://www.facebook.com/
media/set/?set=a.
693597370717686.1073741928.
100002022875470&type=1&l=
da5536296b
